Matarinnkaup og næringarfræði á afreksæfingabúðum
Taekwondo deild Keflavíkur er með afreksæfingabúðir í sumar. Iðkendur æfa aukalega á hverjum degi, en einnig förum við í alls kyns önnur atriði sem eru mikilvæg. Við lærum betri samskipti við þjálfara í keppni, leikgreiningar á okkar eigin og annara bardögum, tæknigreiningu á video, markmiðasetningu, áætlanagerð og margt fleira.
Á æfingabúðunum í dag fórum við í Kasko. Við töluðum um markaðsöflin og hversu margt í búðinni er í raun slæmt fyrir mann. Þegar við vorum aðeins komin nokkra metra inn í búðina gerðu iðkendurnir sér grein fyrir að það var í raun miklu meira af vörum innan seilingar sem voru "óhollar" frekar en "hollar". Við töluðum um að fyrirtækin sem framleiða vörnar í stórmakaðnum græða mikið á börnum, unglingum, íþróttafólki, fólki sem vill breyta heilsunni og óöguðu fólki. Þannig töluðum við um að flestur matur sem er með teiknimyndum á er yfirleitt mjög óhollur en heillar yngri kynslóðina með þessari markaðssetningu.
Við gengum alla búðina og ræddum um hinar ýmsu vörur og vörutegundir. M.a. var þeim sýnt að flestar mjólkurvörurnar í búðinni eru sykraðar og kennt að greina hverjar voru það ekki. Hollar valkostir voru ræddir, talað um hvað væri "best - ágætt -verst" í ákveðnum vorflokkum.
Iðkendurnir spurðu og við ræddum ýmsa hluti. Iðkendurnir voru með glósubók eins og á öllum æfingum og tóku niður punkta um það sem vorum að ræða. Við lærðum að velja hollara brauð, kjöt, korn, hnetur, ávexti og mjólkurvörur.
Þegar við vorum búin að fara í gegnum búðina þá fengu þau 10 mínútur til að versla sér inn fæði fyrir að hámarki 1.000 krónur sem þau áttu að koma með. Allir settu í körfurnar sínar og svo töluðum við um matinn sem þau völdu sér. Sumir breyttu þá valinu eftir það. Það er mjög gott að hafa matvörubúð sem er bókstaflega í næsta húsi við æfingahúsnæðið okkar á Iðavöllum 12.
